Bu gün Bakıda Avropdaxili Vergi Administrasiyaları Təşkilatının (IOTA) "Avtomatik məlumat mübadiləsindən əldə olunan məlumatlardan istifadə" mövzusunda forumu işə başlayıb. IOTA-nın Azərbaycan Respublikası Vergilər Nazirliyi ilə birgə təşkil etdiyi forumda 29 ölkədən 54 ekspert iştirak edir.
Forum zamanı jurnalistlərin suallarını cavablandıran vergilər naziri Mikayıl Cabbarov tədbirin Azərbaycanda keçirilməsinin böyük əhəmiyyət daşıdığını deyib. Nazir bildirib ki, bu tədbir üzv ölkələr arasında məlumat mübadiləsinin faydalılığının təhlili, əldə edilən nəticələrin və iş prosesinin təkmilləşdirilməsi baxımından xüsusi önəm kəsb edir. Mikayıl Cabbarov forumun Bakıda təşkil olunmasını, Azərbaycan Respublikası Vergilər Nazirliyinin bu sahədə fəal əməkdaşlıq edən bir orqan kimi tanınmasını həm də ölkəmizə olan beynəlxalq inamın ifadəsi kimi dəyərləndirib: "Bu gün Azərbaycan Cənubi Qafqazda ən böyük iqtisadiyyata malik ölkə kimi tanınır. Dövlət başçısının rəhbərliyi ilə ölkəmizdə həyata keçirilən iqtisadi islahatlar Azərbaycan iqtisadiyyatının dünya iqtisadiyyatı ilə inteqrasiyası və əməkdaşlığı çərçivəsində qəbul edilir və inanırırıq ki, bu, vergi sistemimizə də böyük fayda verəcək".
Vergilər naziri qeyd edib ki, müasir dünyada bir çox vergi ödəyiciləri, xüsusilə böyük şirkətlər öz fəaliyyətlərini müxtəlif ölkələrdə həyata keçirirlər. Bu baxımdan, IOTA-ya üzv ölkələrlə məlumat mübadiləsi böyük önəm daşıyır: "Hər bir ölkənin vergi qanunvericiliyi çərçivəsində aidiyyəti vergi orqanları üçün maraq kəsb edə bilən məlumatların mübadiləsi ikitərəfli və çoxtərəfli əsasda bağlanmış beynəlxalq müqavilələrlə tənzimlənir. Bu forumda həmin müqavilələrin nəticəsində əldə edilən məlumatların təhlili və ondan səmərəli istifadə olunması, vergi bazasının düzgün müəyyənləşdirilməsi, vergilərin ödənilməsində şəffaflığın təmin edilməsi, bərabərliyin təmin olunması, artıq vergilərin ödənilməməsi, yaxud ödənilməyən vergilərin düzgün ödənilməsinin təmin edilməsi kimi məsələləri müzakirə edəcəyik".