Azərbaycan Mərkəzi Bankı Ümummilli Lider Heydər Əliyevin 100 illik yubileyinə həsr olunan pul nişanları təqdim edib.

“vergiler.az” AMB-yə istinadən xəbər verir ki, ölkə tarixində ilk dəfə olaraq yüksək əyarlı Azərbaycan qızılından hazırlanan investisiya məqsədli pul nişanları bu ilin 10 may tarixindən etibarən tədavülə buraxılacaq.

Eyni zamanda, Ulu Öndər Heydər Əliyevin anadan olmasının 100 illik tarixinin əbədiləşdirilməsi məqsədilə yubiley pul nişanları da tədavülə buraxılacaq. Bu pul nişanları xüsusi dövlət tədbirləri üçün nəzərdə tutulub.

Yubiley və investisiya məqsədli pul nişanları Böyük Britaniyanın “The Royal Mint” şirkətində ən yüksək beynəlxalq standartlara uyğun istehsal edilib.

İlk dəfə olaraq tədavülə buraxılacaq investisiya məqsədli pul nişanlarının satışı və geri alışı Mərkəzi Bank tərəfindən həyata keçiriləcək.

Beynəlxalq təcrübəyə uyğun olaraq, bu pul nişanları uzunmüddətli investisiya aləti və əhalinin yığım vasitəsi kimi istifadə olunması məqsədilə yüksək əyarlı qızıldan hazırlanıb və buraxılış limitinə məhdudiyyət qoyulmadan tələbə uyğun istehsal edilərək tədavülə buraxılacaq.

Yubiley və investisiya məqsədli pul nişanları nominal dəyərləri ilə ölkə ərazisində qanuni ödəniş vasitəsidir.