Pandemiya ilə bağlı yaranan 3 illik fasilədən sonra 4-6 aprel tarixlərində Bakı Ekspo Mərkəzində 19-cu Azərbaycan Beynəlxalq Turizm və Səyahətlər Sərgisi - “AITF 2023” keçiriləcək.

Sərgisinin təşkilatçısı “Caspian Event Organisers” şirkətindən “vergiler.az”a verilən məlumata görə, ənənəvi olaraq, sərgi müxtəlif ölkələrdən turizm sənayesinin nümayəndələrini, milli və regional turizm təşkilatlarını və dövlət qurumlarını bir araya gətirəcək.

Sərgiyə Belarus, Bolqarıstan, Çexiya, Gürcüstan, İsveçrə, Kuba, Polşa, Özbəkistan, Rusiya, Sloveniya, Tunis və digər ölkələrdən olan şirkətlər qatılacaq. Ənənəvi olaraq xarici ölkələr milli stendlərlə təmsil olunacaq. Bu dəfəki sərgidə Belarus, Çexiya, Polşa və Özbəkistan öz milli stendləri ilə iştirak edəcək.

Sərgi çərçivəsində panel müzakirələr aparılacaq, ikitərəfli B2B görüşlər keçiriləcək, yerli və xarici şirkətlərin nümayəndələri qarşılıqlı əməkdaşlıq yollarını və tərəfdaşlığın digər formalarını müzakirə edəcəklər.