Ölkələr arasında ticarət və iqtisadi əlaqələri daha da genişləndirmək üçün Azərbaycan-Macarıstan Birgə İşgüzar Şurası yaradılır. Azərbaycan Respublikası Sahibkarlar (İşəgötürənlər) Təşkilatları Milli Konfederasiyasından (ASK) “vergiler.az”a verilən məlumata görə, bu məqsədlə fevralın 16-17-də Macarıstanın paytaxtı Budapeşt şəhərində keçirilən Azərbaycan və Macarıstan hökumətləri arasında iqtisadi əməkdaşlıq üzrə Birgə Komissiyanın 9-cu iclasında Azərbaycan-Macarıstan Birgə İşgüzar Şurasının yaradılması haqqında saziş imzalanıb.

Sazişə əsasən, tərəflər Şuranın məqsədləri və işçi qrupunun formalaşdırılması üzrə vəzifələri müəyyən ediblər. Şuranın yaradılmasında məqsəd Azərbaycan və Macarıstanda birgə investisiyaların təşviqi, qarşılıqlı ticarət dövriyyəsinin artırılması və iqtisadi əlaqələrlə bağlı qarşıya çıxan məsələlərin həllinə nail olmaqdır.