Korporativ qiymətli kağızların dövriyyəsi artıb

2022-ci ilin I yarımili ərzində ölkənin qiymətli kağızlar bazarında kiçilmə müşahidə edilsə də, korporativ qiymətli kağızların dövriyyəsində artım qeydə alınıb.

“vergiler.az” xəbər verir ki, bu barədə Azərbaycan Mərkəzi Bankının cari yarımillik Maliyyə Sabitliyi Hesabatında bildirilir.

Qeyd edilir ki, qiymətli kağızlar bazarının ümumi ticarət dövriyyəsi əvvəlki ilin müvafiq dövrü ilə müqayisədə 3.5% azalaraq 8.2 mlrd. manat olub. Qiymətli kağızlar bazarında azalma dövlət qiymətli kağızları hesabına olub. Belə ki, dövlət qiymətli kağızlarının dövriyyəsi 14% və ya 730 mln. manat azalıb. Eyni zamanda, korporativ qiymətli kağızlarının dövriyyəsində 89% və ya 376 mln. manat, repo əməliyyatları üzrə ticarət dövriyyəsində isə 2% və ya 46 mln. manat artım müşahidə edilib.